ປະຫວັດຄວາມເປັນມາຂອງວັນແມ່ຍິງສາກົນ 8 ມີນາ ( International Women’s Day)

         

       ຄວາມເປັນມາວັນແມ່ຍິງສາກົນ 8 ມີນາ ( International Women’s Day) 8 ມີນາ ປີ 2021 ນີ້ຖືເປັນວັນຄົບຮອບ 111 ປີ ຂອງວັນແມ່ຍິງສາກົນ ໃນການທ້ວງສິດຄວາມສະເໝີ ພາບ, ຄວາມຢຸດຕິທຳ, ສັນຕິພາບ ແລະ ການພັດທະນາ ແກ່ເອື້້ອຍນ້ອງຍິງໃນທົ່ວໂລກ.

 

         ຈຸດເລີ່ມຕົ້ນຂອງການກ້າວມາເປັນວັນແມ່ຍິງສາກົນ ແມ່ນເກີດມາຈາກກຳມະກອນແມ່ຍິງໃນໂຮງງານຕ່ຳແຜ່ນແຫ່ງໜຶ່ງໃນລັດນິວຢອກ, ສະຫະລັດອາເມຣິກາ ໄດ້ພາກັນລຸກຮື້ຂຶ້ນປະທ້ວງໃຫ້ນາຍຈ້າງເພີ່ມຄ່າແຮງ ແລະ ຮຽນຮ້ອງສິດຂອງພວກເຂົາ, ແຕ່ວ່າສຸດທ້າຍກັບຕ້ອງມີແມ່ຍິງເຖິງ 119 ຄົນ ຕ້ອງເສຍຊີວິດຈາກເຫດການນີ້ ໂດຍການທີ່ມີຄົນລັກລອບວາງເພີງເຜົາໂຮງງານທີ່ພວກເຂົານັ່ງຊຸມນຸມຢູ່ ໂດຍເຫດການທັງໝົດນີ້ໄດ້ເກີດຂຶ້ນໃນວັນທີ 8 ມີນາ ປີ ຄ.ສ 1857.

         ຈາກນັ້ນຕໍ່ມາໃນປີ ຄ.ສ 1907 ກໍາມະກອນແມ່ຍິງໃນໂຮງງານຕໍ່າແຜ່ນທີ່ເມືອງຊິຄາໂກ, ສະຫະລັດອາເມຣິກາ ທົນບໍ່ໄດ້ຕໍ່ການເອົາລັດເອົາປຽບ, ກົດຂີ່ຂູດຮີດທາລຸນຂອງພວກນາຍຈ້າງທີ່ໃຊ້ແຮງງານພວກເຂົາສ່ຳທາດເນື່ອງຈາກກຳມະກອນເຫຼົ່ານີ້ຕ້ອງເຮັດວຽກໜັກເຖິງ 16-17 ຊົ່ວໂມງຕໍ່ວັນ ໂດຍບໍ່ມີວັນພັກ, ບໍ່ມີປະກັນ ຫຼື ສະຫວັດດິການໃດໆທັງສິ້ນ ສົ່ງຜົນໃຫ້ເກີດມີການເຈັບເປັນລົ້ມຕາຍໃນໄລຍະເວລາພຽງສັ້ນໆ ແຕ່ພັດໄດ້ຮັບຄ່າແຮງຕ່ຳ ແລະ ຖ້າຫາກແມ່ຍິງຄົນໃດຖືພາກໍຈະຖືກໄລ່ອອກ.

         ຍ້ອນຄວາມອັດອັ້ນຕັນໃຈ ຈຶ່ງເຮັດໃຫ້ ນາງ ຄລາຣາ ເຊດຄິນ ນັກການເມືອງແມ່ຍິງສາຍແນວຄວາມຄິດສັງຄົມນິຍົມຊາວເຢຍລະມັນ ໄດ້ຕັດສິນໃຈປຸກລະດົມບັນດາກຳມະກອນແມ່ຍິງ ດ້ວຍການນັດຢຸດງານໃນວັນທີ 8 ມີນາ ປີ ຄ.ສ 1907 ພ້ອມກັນນັ້ນກໍໄດ້ຮຽກຮ້ອງໃຫ້ນາຍຈ້າງຫຼຸດເວລາການເຮັດວຽກລົງໃຫ້ເຫຼືອ 8 ຊົ່ວໂມງຕໍ່ວັນ, ນອກຈາກນັ້ນຍັງໃຫ້ປັບປຸງສະຫວັດດີການທຸກຢ່າງ ແລະ ໃຫ້ແມ່ຍິງມີສິດອອກສຽງເລືອກຕັ້ງອີກດ້ວຍ. ຢ່າງໃດກໍຕາມ ເຖິງວ່າການຮຽກຮ້ອງໃນຄັ້ງນີ້ ຈະບໍ່ໄດ້ຮັບຜົນສຳເລັດຍ້ອນວ່າມີແຮງງານແມ່ຍິງຫຼາຍຮ້ອຍຄົນຖືກຈັບກຸ່ມຄຸມຂັງ ແຕ່ມັນກໍໄດ້ເຮັດໃຫ້ມີແມ່ຍິງທົ່ວໂລກສະໜັບສະ ໜູນການກະທຳຂອງ ນາງ ຄລາຣາ ເຊດຄິນ ພ້ອມທັງເປັນການຈູດຊະນວນໃຫ້ແມ່ຍິງທົ່ວໂລກເລີ່ມຄຳນຶງເຖິງສິດທິຂອງຕົນເອງຫຼາຍຂຶ້ນ.

            ຕໍ່ມາໃນວັນທີ 8 ມີນາ ປີ ຄ.ສ 1908 ໄດ້ມີກໍາມະກອນແມ່ຍິງຫຼາຍກວ່າ 15.000 ຄົນຮ່ວມເດີນຂະບວນທົ່ວເມືອງນິວຢອກ ຮຽກຮ້ອງໃຫ້ຢຸດຕິການໃຊ້ແຮງງານເດັກນ້ອຍໂດຍມີຄຳຂວັນໃນການປຸກລະດົມວ່າ “ຂະໜົມປັງກັບດອກກຸຫຼາບ” ເຊິ່ງໝາຍເຖິງການໄດ້ຮັບອາຫານທີ່ພຽງພໍພ້ອມໆກັບຄຸນນະພາບຊີວິດທີ່ດີ. ຈົນມາເຖິງ ວັນທີ 8 ມີນາ ປີ ຄ.ສ 1910 ຄວາມພະຍາຍາມຂອງກໍາມະກອນແມ່ຍິງກຸ່ມດັ່ງກ່າວກໍປະສົບຜົນສຳເລັດ ເມື່ອມີຕົວແທນແມ່ຍິງຈາກ 17 ປະເທດເຂົ້າຮ່ວມປະຊຸມສະມັດຊາແມ່ຍິງສັງຄົມນິຍົມ ຄັ້ງທີ 2 ທີ່ເມືອງໂຄເປັນເຮເກນ ປະເທດເດັນມາກ ໂດຍໃນທີ່ປະຊຸມໄດ້ປະກາດຮັບຮອງຂໍ້ຮຽກຮ້ອງຂອງບັນດາກຳ ມະກອນແມ່ຍິງໃນລະບົບສາມ 8 ຄື: ຍອມໃຫ້ຫຼຸດເວລາເຮັດວຽກເຫຼືອມື້ລະ 8 ຊົ່ວໂມງ, ໃຫ້ເວລາສຶກສາຫາຄວາມຮູ້ເພື່ອພັດທະນາຄວາມສາມາດຂອງໂຕເອງອີກ 8 ຊົ່ວໂມງ ແລະ ອີກ 8 ຊົ່ວ ໂມງເປັນເວລາພັກຜ່ອນ.ພ້ອມກັນນີ້, ຍັງໄດ້ປັບຄ່າແຮງງານຂອງແຮງງານແມ່ຍິງໃຫ້ເທົ່າທຽມກັບແຮງງານຜູ້ຊາຍ ແລະ ຍັງມີການຄຸ້ມຄອງສະຫວັດດີການແມ່ຍິງ ແລະ ແຮງງານເດັກນ້ອຍນຳອີກ. ພ້ອມທັງໄດ້ຮັບຮ້ອງຂໍ້ສະເໜີຂອງ ຄລາຣາ ເຊດຄິນ ໂດຍ ການກຳນົດໃຫ້ວັນທີ 8 ມີນາ ຂອງທຸກໆປີເປັນ “ວັນແມ່ຍິງສາກົນ”.

ຜົນກະທົບທີ່ເກີດຂື້ນໃນທົ່ວໂລກ: ວັນແມ່ຍິງສາກົນ ບໍ່ໄດ້ເປັນພຽງມື້ທີ່ກຸ່ມແມ່ຍິງທົ່ວໂລກສະຫຼອງເທົ່ານັ້ນ ແຕ່ມັນຍັງເປັນມື້ທີ່ອົງການສະຫະປະຊາຊາດໄດ້ຮ່ວມສະ ເຫຼີມສະຫຼອງ ແລະ ອີກຫຼາຍປະເທດໄດ້ກຳນົດໃຫ້ມື້ດັ່ງກ່າວເປັນມື້ພັກປະຈຳຊາດ ເປັນຕົ້ນເຊັ່ນ: ປະເທດລາວຂອງພວກເຮົາ, ສສ ຫວຽດນາມ, ກຳປູເຈຍ ແລະ ປະເທດອື່ນໆ.

-------------------------------------------------------

ຖ້າທ່ານໃດອ່ານແລ້ວຮູ້ສຶກວ່າເປັນປະໂຫຍດກັບໂຕທ່ານແລະຄົນອ້ອມຂ້າງ ສາມາດກົດ ກົດ Share ເພື່ອເປັນກຳລັງໃຈໃຫ້ພວກເຮົາໃນການສ້າງຄອນເທັ້ນດີໆແລະມີສາລະແບບນີ້ຕໍ່ໄປ.

ສຸດທ້າຍຂໍອະນຸຍາດຂາຍເຄື່ອງເດີ:

ຖ້າທ່ານຕ້ອງການຮູ້ສາລະທີ່ໜ້າສົນໃຈກຽ່ວກັບການອອກແບບທີ່ຫຼາກຫຼາຍ ຫຼືຢາກໃຊ້ບໍລິການອອກແບບຂອງພວກເຮົາສາມາດຕິດຕໍ່ໄດ້ທີ່:

Facebook Fan page : HUB Design

Email: HUBDesignlao@gmail.com

ສອບຖາມ: 020 5998 3540

#ວັນແມ່ຍິງສາກົນ

#ປະຫວັດວັນແມ່ຍິງ

#8ມີນາ

#HUBDesign

#ຮັບອອກແບບສື່ໂຄສະນາ

#ຮັບອອກແບບໂລໂກ້

#ຮັບອອກແບບສະຖາປັດ

#ArchitectureDesign

#GraphicDesign

ແຫຼ່ງທີ່ມາຂອງຂໍ້ມູນ: https://www.facebook.com/LearnHistory98/

https://en.wikipedia.org/wiki/International_Women%27s_Day